У час асенніх канікул вучні Грынкаўскай базавай школы Свіслацкага раёна, члены аб’яднання па інтарэсах “Веласіпедны турызм”, адправіліся ў аднадзённы паход на веласіпедах. У маршруце падарожжа было некалькі прыпынкаў. Першы прыпынак зрабілі каля ракі Калонка. Затым падарожнікі накіраваліся на хутар Леснічоўка, дзе знаходзіцца кантрольна-прапускны пункт у Нацыянальны парк “Белавежская пушча”. Апошнім прыпынкам велапаходу было возера Пясец, якое блакітнай жамчужынай раскінулася ў маляўнічым кутку Белавежскай пушчы. Вучні ўспомнілі паданні пра паходжанне назвы возера, пачутыя ад мясцовых старажылаў. Каля возера вучні затрымаліся на гадзіну, падсілкаваліся, адпачылі і накіраваліся ў зваротны шлях. Велапаход атрымаўся цікавым і пазнавальным, пакінуў ва ўсіх падарожнікаў шмат новых уражанняў і станоўчых эмоцый.